Boletín Oficial del Arzobispado de Santiago
Día de Xaxún voluntario
e
Xornada de oración e solidariedade cristiá
Queridos diocesanos:
Desde o primeiro momento en que apareceu a marea negra de nel vertido polo Prestige, todos nos seguimos e estamos a seguir con tensión non pequena e consternación xeneralizada as desastrosas consecuencias para moitas persoas e familias no ámbito humano, ecolóxico e social.
Co meu comunicado, o día 17 de novembro, quixen manifestar xa entón, no nome de toda a diocese, a nosa proximidade e solidariedade. Posteriormente, o día 3 de decembro, reuninme cos sacerdotes das parroquias máis directamente afectadas para analizar pastoralmente a situación. Entre outras colaboracións, entón poñiamos a disposición os locais das nosas igrexas para acoller ó voluntariado e viámo-la urxencia de facer unha colecta diocesana para aporta-la nosa axuda económica naquelas situacións máis extremas de necesidade.
Por elo cómpreme convocar para o domingo, día 22 deste mes, unha Xornada de oración e solidariedade cristiá, realizando en toda a Diocese dita colecta a través de Caritas diocesana. No medio desta situación azarosa temos que aviva-la nosa esperanza á que se nos chama neste tempo litúrxico de Advento. É unha ocasión para pedirlle ó Señor que mire compasivo as nosas penas, alivie os nosos sufrimentos e fortaleza a nosa fe para que sempre confiemos na súa paternal providencia.
Invito á vez a vivi-lo próximo 20 de decembro coma día de xaxún voluntario. Esto implica unha actitude de fe, de humildade, de sobriedade e de total dependencia de Deus. O xaxún, unido inseparablemente á oración e sen esquece-la xustiza, "fortalece a virtude, suscita a misericordia, implora a axuda divina e conduce á conversión do noso corazón", para afrontar solidariamente e fraternalmente as consecuencias coma a que estamos a padecer. Todos, nenos coas súas pequenas privacións, xoves e adultos podemos contribuír destinando aquelo do que nos privamos coma axuda as persoas que sufriron o prexuízo desta marea negra. É momento de mirar adiante con esperanza a instancia dunha solidariedade humana e cristiá fundamentada no noso compromiso Cristián.
Sei da vosa dilixente sensibilidade, e confío plenamente en que esta chamada atopará unha resposta xenerosa en tódalas persoas de boa vontade. Agradecendo a colaboración prestada polas nosas xentes do mar, polas do voluntariado e polas diferentes institucións, coma tamén os signos de comuñón fraterna das demais dioceses de España, saúdavos con afecto e bendice no Señor,
V
Julián Barrio Barrio
Arzobispo de Santiago de Compostela
